Алматы облысына +1 келешек мектебі
Талғар ауданына қарасты Талдыбұлақ ауылында ұлттық жоба аясында бой көтерген 600 орындық заманауи білім ошағы пайдалануға берілді. Мердігер компания – «ДИАЛ СТРОЙ».
Ауылдағы жалғыз №34 орта мектеп-гимназиясы 1967 жылы салынған, сыйымдылығы 320 оқушы болса да, бес есе артық бала оқып, үш ауысымда білім алуға мәжбүр. Оқушы орындарының тапшылығы 850-ден асады. Сол себепті, жаңа мектеп елдімекенге ауадай қажет болды. Енді Талдыбұлақ балалары замауи, зәулім, соңғы үлгіде жабдықталған мектепте білім алады.
Жаңа мектептің жалпы аумағы – 8050 шаршы метр. Мұнда 138 орындық акт залы, 176 орындық асхана, екі спортзал, хореография залы, кітапхана, үлкен стадион, волейбол алаңы және футбол алаңы бар.
Ашылу салтанатында мектеп ұжымы мен ата-аналар жаңа ғимараттың жайлылығын ерекше атап өтіп, бұл тек оқу орны ғана емес, балалардың өздерін қауіпсіз әрі сенімді сезінетін кеңістік екенін атап өтті.
Білім ошағы Президент Қасым-Жомарт Тоқаевтың бастамасымен жүзеге асырылып жатқан «Келешек мектептері» ұлттық жобасы бойынша салынды. Жобаның бірыңғай операторы - «Samruk-Kazyna Constuction» АҚ. Компанияның білікті құрылысшылар, жобалаушылар және басқа да мамандардан құралған үлкен командасы мектептердің жайлы, заманауи әрі сапалы болуы үшін бар күшін салуда. Сондай-ақ бірыңғай оператор отандық құрылыс саласына цифрландыру және өнімділікті арттыру бойынша бірқатар жаңашылдықтар ендіріп, ұлттық жобаны жүзеге асру барысында пилоттық режимде жемісті пайдалана білді.