Жаңақоныста жаңа мектеп ашылады
«Келешек мектептері» ұлттық жобасы аясында Ақтөбедегі Жаңақоныс-2 тұрғын алабында 600 орынға арналған жаңа мектеп бой көтерді.
Мектепті SG Kurylys компаниясы салып жатыр. Бүгінде жұмыс қарқынын арттырған мердігер ұйым оқу ордасының кірпішін қалап, ішін сылауға кірісіп кетті. Тамыз айында шатыры жабылып болуға тиіс. Жаңа білім ордасын осы жылғы оқу жылының екінші тоқсанында тапсыру жоспарланып отыр.
Жаңа мектеп пайдалануға берілген соң, Жаңақоныс-2 тұрғын алабының балаларын сапалы біліммен қамтуға айтарлықтай мүмкіндік туады.
Айта кетейік, «Келешек мектептері» ұлттық жобасы аясында 2023-2025 жылдар аралығында облыста үш ауысымды, құлағалы тұрған және орын тапшылығы бар мектептердің мәселелерін шешу мақсатында 11 400 орындық 14 мектеп салу жоспарланды.
Сондай-ақ бүгінде 13 630 орынға арналған 28 мектептің құрылысы жүргізілуде. Оның ішінде «Жайлы мектеп» ұлттық жобасы аясында 12 мектептің, жергілікті бюджет есебінен 3 090 балаға арналған 12 мектептің және жеке инвестор есебінен
1 060 орынға арналған 2 мектеп бар. Жыл аяғына дейін 20 мектеп іске қосылмақ.
Ақбота ҚАЛДЫБЕК.