Білім күні Алматыда 7 жаңа мектеп ашылады
Алматыда оқу орындарының тапшылығын азайту және білім беру нысандарын жаңарту мақсатында "Келешек мектептері" және "1300 мектепті жаңғырту" жобалары қарқынды жүзеге асырылып жатыр, деп жазады inbusiness.kz сайты.
Жаңа оқу жылы қарсаңында биыл салынған 7 мектеп оқушыларға есігін айқара ашады.
"Келешек мектептері" жобасы аясында 34 800 орынға шақталған 21 мектептің құрылысы жүріп жатыр. Оның ішінде 13 мектеп "Samruk-Kazyna Construction" компаниясының қатысуымен бой көтеруде.
Сонымен қатар "сатып алу" тетігі арқылы жеке инвесторлардың қатысуымен 8 мектеп салынып жатыр. Олардың екеуі қыркүйекте оқушыларды қабылдайды.
– "1300 мектепті жаңғырту" бағдарламасы бойынша 31 білім беру мекемесін кезең-кезеңімен жаңарту жоспарланған. 2025 жылы – 15, 2026 жылы – 9, 2027 жылы – 7 мектеп жаңартылады, – делінген әкімдік таратқан хабарламада.
Бұдан өзге қалада 13 мектеп пен 8 қосалқы ғимарат сейсмикалық тұрғыда нығайтылып, қайта жөнделіп жатыр. Бұл жұмыстардың нәтижесінде 3 мыңнан астам қосымша орын ашылады.
Осылайша, жаңа мектептердің ашылуы мен қолданыстағы оқу орындарының жаңартылуы Алматыдағы мыңдаған оқушыға қолайлы білім алу жағдайын қамтамасыз етеді.
https://inbusiness.kz/kz/last/bilim-kuni-almatyda-7-zhana-mektep-ashylady