Қарағанды облысында «Жайлы мектеп» ұлттық жобасы бойынша 18 білім ошағы салынады
Облыс орталығы Қарағанды қаласында биыл 4 жайлы мектеп қолданысқа берілмек.
Бұл туралы жобаның бірыңғай операторы саналатын «Samruk-Kazyna Construction» АҚ Басқарма Төрағасының бірінші орынбасары Ғабит Малғаздаров «Хабар24» телеарнасының эфирінде мәлімдеді.
Ол ұлттық жобаның апаттық және үш ауысымды мектептерді жоюға бағытталғанын айтты.
«Қарағанды облысында 2023-2025 жылдар аралығында 18 мектеп қарастырылған. Оның ішінде 10 мектеп 2023-2024 жылдарға арналған, яғни осы жылдың соңына дейін аяқталуы тиіс. Оның ішінде 4 мектеп Қарағанды қаласында, 1 мектеп Балқаш қаласында және 5 мектеп ауылдарда салынады», – деді Малғаздаров «Міндет пен меже» бағдарламасына берген сұхбатында.
Қарағанды қаласы білім басқармасының мәліметінше, кеншілер шаһарында 1 үшауысымды мектеп болса, 9 білім ошағы жобалық қуатынан асып, шамадан тыс жүктелген. Тағы екі мекеменің ғимараты апаттық деп танылған. Осы орайда, Samruk-Kazyna Construction басшысының орынбасары қалада бой көтеріп жатқан білім ошақтарының біріне ерекше тоқталды.
«Бұл 2000 орындық мектеп «Кеңдала» деген шағын ауданда орналасқан. Біздің мектептердің айырмашылығы, біріншіден, кіші және үлкен сыныптар араласпайды, қиылыспайды. Буллингті болдырмау үшін 1-ші қабатта – кіші сыныптар, ал 3-4 қабаттарда үлкен сыныптар оқиды. Екінші айырмашылығы – спорт залдары. Бұл мектептің ішінде 4 спорт залы болады: екі үлкен және екі кішкентай. Үшінші айырмашылығы –мектептерде STEM-зертхана, робототехника, хореография залдары болады. Айта кететін тағы бір ерекшелігі, инклюзия кабинеттері қарастырылған», – деп атап өтті Басқарма Төрағасының орынбасары.
Сондай-ақ, «Міндет пен меже» бағдарламасында жоба аясында салынатын жайлы мектептердің тұжырымдамалық айырмашылығы жіктелді. Олар:
- бірыңғай құрылыс стандарттарын сақтау;
- балалардың қауіпсіздік шараларын арттыру;
- бастауыш және жоғарғы сынып оқушылары үшін бөлек оқу блоктары мен спорт залдарының болуы;
- мүмкіндігі шектеулі балаларға қажетті жағдай жасау.
Оның үстіне, құрылыс кезінде барлық жиһаз қазақстандық тауар өндірушілерден сатып алынатыны жайында айтылды. Сыртқы қасбетті әрлеуде қолданылатын материалдардың да басым бөлігі отандық өнім болмақ.
«Құрылыс материалдарының 90%-ы Қазақстанда шығарылады. Шетелден ешқандай материал әкелініп жатқан жоқ. Жиһаз мәселесі бойынша, Үкіметтің Қаулысында тек қана отандық өнім болуы тиіс деген талап қойылған. Оны біз орындаймыз», – деп түйіндеді Ғабит Малғаздаров.
«Жайлы мектеп» пилоттық ұлттық жобасын жүзеге асыруға 2023-2025 жылдар аралығында 2,3 трлн теңге қарастырылған. Барлығы 369 оқу ошағы бой көтереді. Биыл 461 мың оқушыға шақталған ұзын-саны 217 мектеп қолданысқа беріледі. Қалған 151 нысанның құрылысы 2025 жылы аяқталады деп жоспарланған.